Rematou o festival con moi bon sabor de boca. Todos e todas disfrutamos dun grande ambiente que queremos agradecer especialmente a todas a persoas que partipástedes nas diferentes actividades. Desde o Torneo de Birlos, os postos de artesanía, o xantar, os pasarrúas, os artistas da tarde ou os concertos da noite, en todo momento a festa e o bo humor foron a nota predominante. Xa estamos preparando a edición do ano que ven na que tentaremos sorprender con algunha novidade que xa estamos argallando. Serán ben recibidas as propostas e ideas, gostaríamos de saber o que vos gustou e o que non tanto. Como algo a mellorar, tentaremos que os concertos rematen un pouco antes para que o descanso tamén sexa posíbel, xa que este ano moitos xuntamos a noite e o día. Finalmente agradecer a todas as persoas que colaboraron e traballaron para que todo saira ben e para que un ano máis podamos falar de éxito o que fai que renovemos as gañas de seguir mantendo un festival popular, independente e participativo, en Pantón e na Ribeira Sacra. Vémonos nos bares!

 

O programa xa está completo e temos preparadas unha morea de actividades para que desde a mañá do sábado até case o amencer do domingo non pare a festa. Achégate a Pantón a disfrutar destas estimulantes propostas! Pola mañá comezaremos coa final do Torneo de Birlos, a apertura da Feira de Artesanía e os pasarúas da Teboada do Baixo Minho que cos seus tambores despertarán aos veciños e veciñas de Ferreira e porán a funcionar toda a maquinaria festeira no Castro. Coa chegada do mediodía comeza o Xantar popular que rematará coa animación musical da charanga dos Veraneantes. E xa entre probas de son e paseos polo festival comezaremos co teatro de rúa e o novo circo de Cigânì & Cía e os arxentinos Dj Capuzzi e a Señorita X que garantizan, por contrato, a diversión e as risas de novos e maiores. E así iremos chegando á noite onde disfrutaremos dun espectacular concerto, que se prolongará até case facerse dia e que será presentado polo humorista David Amor que dará paso actuar os bercianos de Aira da Pedra coa visón do folk, á sempre sorprendente actuación dos eléctricos Festicultores, o novo traballo dos Cuchufellos, Achegaivos Feligreses, o funky-reagge-rap de Som do Galpom e o rotundo hip-hop dun dos mellores grupos galegos como é Dios Ke Te Crew. Música e actividades para todos os gustos para non perderse. Lembra que temos zona de acampada e todo o necesario para disfrutares da festa. Vémonos o sábado!

 

Pincha aquí para ver o libro co programa completo do Festival.

Un desgraciado accidente nun concerto en Eslovaquia vai impedir que United Flavour veñan ao festival este ano. Nunha descomunal tormenta unha estrutura metálica caeu sobre o público provocando ducias de feridos e un mozo falecido. Tras esta triste situación o grupo está cancelando concertos por non atoparse no mellor dos estados anímicos para tocar. Desde aqui queremos mandarlle o noso ánimo e desexamos que o ano vindeiro podan estar con nós. O Festival continúa e xa contamos con uns susbtitutos de luxo como son os Som do Galpom que coa súa particular combinación de funky-reagge-rap xa se teñen convertido nun dos grupos mais solicitados do panorama musical galego. Unha actuación para non perderse.

Xa está confirmado! Ás xa anunciadas de Cuchufellos e United Flavour únense o grupo folk berciano Aira da Pedra, os sempre espectaculares e imprevisíbeis Festicultores e de novo en Pantón, presentando o seu novo traballo, o hip-hop de Dios Ke Te Crew. Con isto pechamos o concerto e contaremos tamén, para o programa de tarde, co clown de inspiración balcánica de Cigani & company. Ainda queda algunha surpresa máis, que iremos anunciando nos proximos días. Xa falta menos!